Frisør til frukost
Årets nynorskbrukarar 2019, frisørane Irene Stana og Trude Lundevall.Foto: Jarl Martin Garder, Kristian Dale

Frisør til frukost

08.00–08.45 Møre Folkehøgskule, Ørsta
Nynorsk som identitets- og marknadsføringsspråk

Dei to frisørkjedene Floke og Balanzera er kåra til Årets nynorskbrukarar 2019. Det er tjuande gongen prisen blir delt ut, og dei to vinnarane får prisen «for å nytte nynorsk i marknadsføring av frisørtenester i by og bygd på Aust- og Vestlandet», seier styret i Nynorsk kultursentrum i grunngivinga si.

– Sidan eg starta opp Balanzera i 2008, har eg alltid vore bevisst på å bruke nynorsk. Eg har alltid hatt nynorsk som hovudmål, og nytta sjølvsagt høvet til å bevisst kunne skilje meg ut blant dei mange salongane i Oslo, seier Trude Lundevall, eigar i Balanzera. Irene Stana, direktør i Floke, har vore oppteken av det nynorske språket sidan ho byrja å lese som sjuåring.

– Nynorsk er ein viktig del av identiteten min og dermed også identiteten til Floke, seier ho. Rett før BokkeReidars Blues Band går på scena i Aasen-tunet torsdag 13. juni, deler styreleiar Lodve Solholm ut prisen på 50 000 kroner til kvar av vinnarane. Fredag morgon på Møre Folkehøgskule samtaler vinnarane med direktør Per Magnus Finnanger Sandsmark i Nynorsk kultursentrum om å bruke nynorsk som marknadsføringsspråk.

Fredag 14. juni

08.00–08.45 Møre Folkehøgskule, Ørsta
Gratis

Frukost på Møre Folkehøgskule 100 kr per person